الذيب

السلام عليكم

مبارك عليكم الشهر وكل عام وانتم بخير

ليست بجديده.... لكنها تجدد بكم, وسامحونا على التقصير


الذّيب لامنه عوى يجاوبه بالرجم ذيب
وأنا بلشت من ألأمور دقاقها مع جلّها

قامت تبعثر مع سموم الوقت وأولها مشيب
لاحت بعضها من بعضها...ليتني فاطن لّها

والعبره أللي قزّرت عامين ما واالله تغيب
عن خاطر أللي ما زعجها وخافقه ما شلّها

ياذيب لو أشكي عليك تعاف ياذيب القنيب
ياذيب جيتك وألثمن روحي عليك أصلّها

أصلّ قلبي من معاليقه ألى ليتك تجيب
ياذيب حالي لو طواها الياس وشهو حلّها

العلم لامنه لفاني ما يتانيني صويب
يترك غمامة حاجته ماريّةٍ ياعلّها

يا علّها للي وسيع ألأرض تقرب له قرييب
يقبض رهفها من أواخرها إلين يتلّها

الموت من هون الجروح.. لاصار بك جرحٍ عطيب
وإن كررت عليك همٍ مابعد يحصل لّها

العبره أللي قزرت عامين في عين ألطليب
نذرٍ عليها تذلني... وعهدٍ علي ماهلّها

ياذيب أنته لك مداهيلك وأنا رجلٍ غريب
وإن ضاقت ألدنيا عليك تروح تحتك كلّها

لك في نوايفها مراقيبك بعيدٍ أو قريب
ولك في محادرها سواتك..تعرفك وتدلّها

ولي في فيافيها وجودي يابعد وجد الحبيب
ياملّ عيني من سهرها من لها ياملّها

ياوجد حالي وجد من يعجز عن دواه الطبيب
وياوجد قلبٍ من مسافاتٍ عجز ياصلّ لها

وجدي على حالي وجود العود فاليوم العصيب
لا راح من خيرة عياله واحدٍ في غلّها

ياذيب لامنك عويت يجاوبك بالرجم ذيب
وأنا ليامني زعجت الصوت... محدٍ فلّها


وسلامتكم